7 թիվը բաժանվում է միայն 1-ի և ինքն իր վրա: Այլ կերպ ասած, 7 թիվն ունի միայն երկու բնական բաժանարար՝ 1 և 7: 9 թիվն ունի երեք բնական բաժանարար՝ 1, 3 և 9: 18 թիվն ունի վեց բնական բաժանարար՝ 1, 2, 3, 6, 9 և 18: Այն թվերը, ինչպիսիք են 9-ը և 18-ը, անվանում են բաղադրյալ թվեր, իսկ այնպիսիք, ինչպիսին 7-ն է՝ պարզ թվեր:
Բնական թիվը կոչվում է պարզ, եթե այն ունի միայն երկու բնական բաժանարար՝ մեկը և ինքը՝ այդ թիվը:
Բնական թիվը կոչվում է բաղադրյալ, եթե այն ունի երկուսից ավելի բնական բաժանարարներ:
1 թիվն ունի միայն մեկ բնական բաժանարար՝ հենց ինքը, ուստի այն չի համարվում ոչ բաղադրյալ և ոչ էլ պարզ թիվ:
2 թիվը ամենափոքր պարզ թիվն է: Դա միակ զույգ պարզ թիվն է: Մնացած պարզ թվերը կենտ են: Առաջին տասը պարզ թվերն են՝ 2, 3, 5, 7, 11, 13, 17, 19, 23, 29:
78 թիվը բաղադրյալ է, որովհետև այն զույգ է, այսինքն, բաժանվում է 2-ի: Քանի որ 78 : 2 = 39, ապա 78 = 2 * 39: Մենք 78 թիվը ներկայացրինք երկու արտադրիչների արտադրյալի տեսքով, որոնցից յուրաքանչյուրը մեծ է 1-ից: Ասում են, որ մենք 78 թիվը վերլուծել ենք 2 և 39 արտադրիչների: Առաջին արտադրիչը կլինի 2 թիվը, երկրորդը՝ 78 թիվը այդ արտադրիչի վրա բաժանելիս ստացված քանորդը:
Ցանկացած բաղադրյալ թիվ կարելի է վերլուծել երկու բաղադրիչների, որոնցից յուրաքանչյուրը մեծ է 1-ից: Պարզ թիվն այդպիսի արտադրիչների վերլուծել հնարավոր չէ: