Բացասական թվերի հանումն ունի նույն իմաստը, ինչ և դրական թվերի հանումը՝ տրված գումարով և գումարելիներից մեկով գտնում են մյուս գումարելին: Որոնելի գումարելին կարելի է գտնել նաև այլ կերպ՝ գումարին ավելացնել հայտնի գումարելիին հակադիր թիվը: Օրինակ՝ 8 + 3 = 11, ուստի և 11 – 8 = 3: Բայց 11 + (-8)-ը նույնպես հավասար է 3-ի:
Ընդհանրապես, մի թվից մյուսը հանելու համար պետք է նվազելիին ավելացնել հանելիին հակադիր թիվը:
Օրինակներ.-20 – 39 = -20 + (-39) = -59,
41 – (-17) = 41 + 17 = 58:Այժմ մենք կարող ենք միայն գումարման և հանման նշաններ պարունակող ցանկացած արտահայտություն դիտարկել որպես գումար: Օրինակ, -18 – 14 –ը կարելի է դիտարկել և՛ որպես -18 և 14 թվերի տարբերություն, և՛ որպես -18 և -14 թվերի գումար՝ -18 – 14 = -18 + (-14): -8 + 6 – k արտահայտությունը կարելի է դիտարկել որպես -8, 6 և -k երեք գումարելիների գումար՝ -8 + 6 – k = -8 + 6 + (-k):
Երկու թվերի տարբերությունը դրական է, եթե նվազելին մեծ է հանելիից, և բացասական է, եթե նվազելին փոքր է հանելիից: Եթե նվազելին և հանելին հավասար են, ապա տարբերությունը հավասար է զրոյի: Հանման միջոցով կարելի է լուծել մեծությունների փոփոխության վերաբերյալ զանազան խնդիրներ:
Խնդիր 1. Ցերեկը օդի ջերմաստիճանը փոփոխվել է -12°C-ով և երեկոյան դարձել է -8°C: Ջերմաստիճանը որքա՞ն է եղել առավոտյան:
Առավոտյան ջերմաստիճանը նշանակենք x, այդ դեպքում խնդրի պայմանի համաձայն՝ x + (-12) = -8: Ըստ հանման իմաստի՝ x = -8 – (-12) = 12 – 8 = 4: Առավոտյան օդի ջերմաստիճանը եղել է 4°C:
Խնդիր 2. Օդի ջերմաստիճանը առավոտյան եղել է 5°C, իսկ երեկոյան դարձել է -2°C: Որքանո՞վ է փոփոխվել օդի ջերմաստիճանը ցերեկը:
Դիցուք օդի ջերմաստիճանը փոփոխվել է x°C-ով: Այդ դեպքում 5 + x = -2: Ուրեմն՝ x = -2 – 5 = -7: Օդի ջերմաստիճանը փոփոխվել է -7°C-ով:
Խնդիր 3. Քտնել A(-5) և B(9) ծայրակետերով AB հատվածի երկարությունը:
AB հատվածի երկարությունը ցույց է տալիս, թե A կետը որքան պետք է տեղափոխել դեպի աջ, որպեսզի նա անցնի B կետին, այսինքն՝ -5 թվին որքա՞ն պետք է գումարել, որպեսզի ստացվի 9 թիվը: Այդ պատճառով, եթե AB հատվածի երկարությունը նշանակենք x-ով, ապա -5 + x = 9: Լուծելով այս հավասարումը, կստանանք՝x = 9 – (-5) = 14:Ուրեմն, հատվածի երկարոււթյունը հավասար է 14-ի:
Ընդհանրապես, կոորդինատային ուղղի վրա հատվածի երկարությունը գտնելու համար պետք է նրա աջ ծայրակետի կոորդինատից հանել ձախ ծայրակետի կոորդինատը: