Կոորդինատային ուղղի վրա -4 թվին համապատասխանում է M(-4) կետը: Այդ կետի հեռավորությունը հաշվման սկզբից հավասար է 4 միավոր հատվածի: 4 թիվն անվանում են -4 թվի բացարձակ մեծություն: Ուրեմն, -4 թվի բացարձակ մեծությունը հավասար է 4-ի : Գրում են` |-4| = 4:
2 թվի բացարձակ մեծությունը հավասար է 2-ի, քանի որ B(2) կետը հաշվման սկզբից հեռացած է 2 միավոր հատվածով: 0 թվի բացարձակ մեծությունը հավասար է 0-ի, քանի որ այդ կետը համընկնում է հաշվման սկզբին, այսինքն` նրանից հեռացած է 0 միավոր հատվածով, |0| = 0:
Թվի բացարձակ մեծությունը բացասական լինել չի կարող: Դրական թվի և 0–ի բացարձակ մեծությունը հավասար է նույն թվին, իսկ բացասական թվի բացարձակ մեծությունը` հակադիր թվին:
Օրինակ` |7| = 7, |1.5| = 1.5, |0| = 0, |-7| = 7, |-1.5| = 1.5: