Եթե կարկինի մեկ ոտքը դնենք անշարժ, իսկ մյուսը պտտենք, ապա երկրորդ ոտքի ծայրը կգծի փակ գիծ, որն անվանում են շրջանագիծ։
Հարթության մասը այն սահմանափակող շրջանագծի հետ անվանում են շրջան։ Հարթության այն կետը, որտեղ դրված է կարկինի անշարժ ոտքը, անվանում են կենտրոն։
Շրջանագիծ կառուցելիս կարկինի ոտքերի ծայրերի հեռավորությունը չի փոխվում, ուրեմն, շրջանագծի բոլոր կետերը հավասարապես են հեռացած կենտրոնից։ Շրջանագծի կետը իր կենտրոնի հետ միացնող հատվածն անվանում են շրջանագծի կամ շրջանի շառավիղ։ Նույն շրջանագծի (կամ շրջանի) բոլոր շառավիղները իրար հավասար են։
Եթե վերցնենք M կետը, որը գտնվում է շրջանագծից դուրս, ապա OM հատվածի երկարությունը շառավղից մեծ կլինի. եթե N կետը վերցնենք շրջանի ներսը, ապա ON հատվածի երկարությունը շառավղից փոքր կլինի։
Շրջանագծի վրա գտնվող ցանկացած կետ որպես կենտրոն վերցնելիս նույն շառավղով գծված շրջանագիծը կանցնի O կետով։
Շրջանագծերի հատման կետերը կենտրոնին միացնելով կառուցվում են հավասարակողմ եռանկյուններ։Այն հատվածը, որը միացնում է շրջանագծի երկու կետեր և անցնում է նրա կենտրոնով, անվանում են տրամագիծ։ Շրջանագծի կենտրոնը տրամագիծը բաժանում է երկու շառավղի։
A և B երկու կետերը, որոնք գտնվում են շրջանագծի վրա, այդ շրջանագիծը բաժանում են երկու մասի։ Այդ մասերից յուրաքանչյուրն անվանում են շրջանագծի աղեղ։ A և B կետերն այդ աղեղների ծայրերն են։
OA և OB երկու շառավիղները շրջանը բաժանում են երկու մասի։ Այդ մասերից յուրաքանչյուրն անվանում են սեկտոր։