10-ի բաժանվում են միայն այն թվերը, որոնք կազմված են լրիվ տասնյակներից.
10, 20, 30, 40, 50, 60, 70, 80, 90, 100, 110 և այլն։Այս բոլոր թվերի գրառումը վերջանում է 0 թվանշանով։
Եթե թվի գրառումը վերջանում է 0 թվանշանով, ապա այդ թիվը բաժանվում է 10-ի, եթե թվի գրառումը վերջանում է ցանկացած այլ թվանշանով, ապա թիվը չի բաժանվում 10-ի։
Ամենափոքր բնական թիվը, որը բաժանվում է 5-ի, հենց 5 թիվն է։ Դրա հաջորդ՝ 5-ի բաժանվող թիվը գտնելու համար պետք է 5-ին ավելացնել 5։ Ստանում ենք՝ 5 + 5 = 10։ Հետևյալ՝ 5-ի բաժանվող թիվը կլինի 10 + 5 = 15, իսկ այնուհետև գալիս է 15 + 5 = 20 թիվը։ Շարունակ ստացվում են թվեր, որոնց վերջին թվանշանը 0 կամ 5 է։
Եթե թվի գրառումը վերջանում է 0 կամ 5 թվանշանով, ապա այդ թիվը բաժանվում է 5-ի, եթե թվի գրառումը վերջանում է որևէ այլ թվանշանով, ապա թիվը չի բաժանվում 5-ի։
2-ի բաժանվում են այսպիսի թվեր.
2, 4, 6, 8, 10, 12, 14, 16, 18, 20 և այլն։
Այս բոլոր թվերի գրառումը վերջանում է 0, 2, 4, 6 կամ 8 թվանշաններով։ Պայմանավորվել են այդ թվանշաններն անվանել զույգ, իսկ 1, 3, 5, 7, 9 թվանշանները՝ կենտ։
Եթե թվի գրառումը վերջանում է զույգ թվանշանով, ապա թիվը բաժանվում է 2-ի, եթե թվի գրառումը վերջանում է կենտ թվանշանով, ապա թիվը չի բաժանվում 2-ի։