Հատվածի երկարությունը չափում են քանոնով: Քանոնի վրա նշված են գծիկներ, որոնք այն բաժանում են հավասար մասերի, որոնց անվանում են բաժանումներ: Յուրաքանչյուր բաժանման երկարությունը հավասար է մեկ սանտիմետրի: Քանոնի բոլոր բաժանումները կազմում են սանդղակ, որի միջոցով որոշում են հատվածի երկարությունը: AB հատվածի երկարությունը հավասար է 6 սմ-ի: Գրում են՝ AB = 6 սմ:Եթե X կետը AB հատվածը բաժանում է AX և XB մասերի, ապա ամբողջ հատվածի երկարությունը հավասար է նրա մասերի երկարությունների գումարին:AB = AX + XBԲեկյալի երկարություն անվանում են նրա կողմերի երկարությունների գումարը: Բեկյալի երկարությունը միշտ մեծ է այդ բեկյալի ծայրերը միացնող հատվածի երկարությունից:
Ընդհանրապես, AE հատվածը կարճ է A և E կետերը միացնող ցանկացած գծից:
Բազմանկյան կողմերի երկարությունների գումարն անվանում են բազմանկյան պարագիծ: Ցանկապատված հողամասի պարագիծը հավասար է այդ հողամասը շրջափակող ցանկապատի երկարությանը: Սանդղակներ լինում են ոչ միայն քանոնների վրա: Ջերմաչափի սանդղակը բաղկացած է բաժանումներից, որոնցից յուրաքանչյուրը կազմում է Ցելսիուսի մեկ աստիճան: Սանդղակներից հարմար է օգտվել, եթե նրանց վրա թվեր են գրված: Քանոնի վրա թվերը գրված են յուրաքանչյուր գծիկի մոտ, իսկ ջերմաչափի վրա՝ միայն երկար գծիկների մոտ, յուրաքանչյուր տասը բաժանումից հետո:
Սանդղակներ տեղադրվում են ոչ միայն հատվածների երկարությամբ: Օրինակ, ժամացույցի սանդղակը սովորաբար տեղադրվում է շրջանագծով: