Իմանալու համար, թե քանի մատիտ կա 7 տուփում, որոնցից յուրաքանչյուրում կա 12 մատիտ, պետք է գտնել հետևյալ գումարը.12 + 12 + 12 + 12 + 12 + 12 + 12։Այս գումարը հավասար է 84-ի։ Ուրեմն 7 տուփում կա 84 մատիտ։
Այն գումարը, որի բոլոր գումարելիները իրար հավասար են, 12 + 12 + 12 + 12 + 12 + 12 + 12 գումարի փոխարեն գրում են կարճ 12 * 7։ Այս 12 * 7 արտահայտությունը և նրա 84 արժեքը անվանում են 12 և 7 թվերի արտադրյալ։ 12 և 7 թվերն անվանում են արտադրիչներ կամ բազմապատկիչներ։
Ընդհանրապես, այն գումարը, որը կազմված է b գումարելիներից, որոնցից յուրաքանչյուրը հավասար է a թվին, անվանում են a և b թվերի արտադրյալ և նշանակում a * b։ a և b թվերն անվանում են արտադրիչներ։
Այլ խոսքերով՝ a թիվը բազմապատկել b թվով՝ նշանակում է գտնել այն b գումարելիների գումարը, որոնցից յուրաքանչյուրը հավասար է a-ի։
Օրինակ, 1-ը բազմապատկել b թվով՝ նշանակում է գտնել այն b գումարելիների գումարը, որոնցից յուրաքանչյուրը հավասար է 1-ի։ Այդ գումարը հավասար է b-ի։ Ուրեմն,1 * b = b:0 թիվը բազմապատկել b թվով՝ նշանակում է գտնել այն b գումարելիների գումարը, որոնցից յուրաքանչյուրը հավասար է 0-ի։ Այդ գումարը հավասար է 0-ի։ Ուրեմն,0 * b = 0։Բազմապատկումը կիրառում են շատ խնդիրներ լուծելիս։ Քննարկենք դրանցից մի քանիսը։AB հատվածը բաժանված է 5 հատվածի, որոնցից յուրաքանչյուրն ունի 3 սմ երկարություն։ Ուրեմն AB հատվածի երկարությունը հավասար է 3 * 5 = 15 սանտիմետրի։
Եթե մի թիթեղյա ամանում պարունակվում է 8 լ բենզին, իսկ մյուսում՝ 6 անգամ շատ, ապա երկրորդ ամանը պարունակում է 8 * 6 = 48 լիտր բենզին։
Եթե երեխան 7 տարեկան է, և նա 4 անգամ փոքր է հորից, ապա հայրը 7 * 4 = 28 տարեկան է։