5a²x, 2b³(-3)bc², -3a⁷, xy² արտահայտությունները թվերի, փոփոխականների և նրանց աստիճանների արտադրյալներն են: այդպիսի արտահայտություններն անվանում են միանդամներ: Միանդամներ են համարվում նաև թվերը, փոփոխականները և նրանց աստիճանները: Օրինակ՝ -7, 2³, x, x⁴ արտահայտությունները միանդամներ են:
Պարզեցնենք 2b³(-3)bc² միանդամը՝ օգտվելով բազմապատկման տեղափոխական և զուգորդական հատկություններից.2b³(-3)bc² = 2(-3)b³bc² = -6b⁴c²:Մենք 2b³(-3)bc² միանդամը ներկայացրեցինք առաջին տեղում գտնվող թվային բազմապատկիչի և զանազան փոփոխականների աստիճանի տեսքով: Միանդամի այդպիսի տեսքն անվանում են ստանդարտ տեսք: Ստանդարտ տեսքի միանդամներ են համարվում նաև այնպիսի միանդամներ, ինչպիսիք են -5-ը, a-ն, -a-ն, a³-ը: Ցանկացած միանդամ հնարավոր է բերել ստանդարտ տեսքի:
Ստանդարտ տեսքով գրված միանդամի թվային բազմապատկիչը անվանում են միանդամի գործակից: Օրինակ՝ -6b⁴c² միանդամի գործակիցը -6-ն է: -a² և -ab միանդամների գործակիցները համարվում են համապատասխանաբար 1-ը և -1-ը, քանի որ a² = 1 * a² և -ab = -1 * ab:
7ax²y³ միանդամի մեջ բոլոր փոփոխականների աստիճանների ցուցիչների գումարը հավասար է 6-ի: Այդ գումարն անվանում են 7ax²y³ միանդամի աստիճան: -9b⁴c³ միանդամի աստիճանը հավասար է 7-ի, 3.8x⁵ միանդամի աստիճանը հավասար է 5-ի:
Ընդհանրապես՝ միանդամի աստիճան են անվանում նրա մեջ մտնող բոլոր փոփոխականների աստիճանների ցուցիչների գումարը: Եթե միանդամը փոփոխական չի պարունակում (այսինքն որևէ թիվ է), ապա նրա աստիճանը համարում են հավասար 0-ի: